La ntera ole zzicca te la strata

Ca lu patrunu a fare bella figura,

Lu fattore ole bae rittu cu caccia lu filaru

Ma in silenziu se lu sta face lu paru e sparu.

Iou invece esente te sta discussione

Nu riescu mancu cantu na canzone.

Te pierdi intra alle igne, te manca lu fiatu

Matonna te la benedetta ci sta face cautu.

E menu male osce pe ddhe cicale

Me sta sostituiscenu allu cantare,

Sulu ca la canzune è sempre la stessa

Basta ca nc'è la musica, quiddhu ni nteressa,

Ci su ngraziate quandu cantanu ncoru

Iata a iddhe, nu tenenu problemi e poi, è lu tiempu loru.

Alla pausa nu ni basta l'acqua iacciata, 

Ma nui l'imu fare la sciurnata.

La perenospula ni sta demoralizza 

Ma nui continuamu, ca cu la igna tinimu amicizia.

Passa la gente ca sta bae a mare

Ni uarda "oh poveri fessa, stati ancora a fatiare!"

Tagghiamu li selvaggi ca se mbrigghianu all'anche comu zigarelle,

Poi te giri te retu e biti  le igne comu parenu belle.

Cchiui te quiddhu ca sta facimu auru nu se po' fare

Ma l'ua allu patrunu ni l'imu salvare.

Finalmente rria l'ura te lu scapulare

Oqnunu te nui ae pissacchiatu e sudatu 

Oimmena osce ci sta face cautu.

 

Maria Miglietta ( Torchiarolo )